2Ch 11 | NdeIBE | STEP | Kwathi uRehobhowami esefike eJerusalema wamema bonke abakoJuda labakoBhenjamini – amadoda empi ayizinkulungwane ezilikhulu lamatshumi aficamibili – ukuba bayekulwa labako-Israyeli ukuze babuyisele uRehobhowami embusweni.

2 Chronicles 11

1 Kwathi uRehobhowami esefike eJerusalema wamema bonke abakoJuda labakoBhenjamini – amadoda empi ayizinkulungwane ezilikhulu lamatshumi aficamibili – ukuba bayekulwa labako-Israyeli ukuze babuyisele uRehobhowami embusweni.

2 Kodwa ilizwi likaJehova lafika kuShemayiya umuntu kaNkulunkulu lisithi: 3 “Tshela uRehobhowami indodana kaSolomoni inkosi yakoJuda, labo bonke abako-Israyeli koJuda lakoBhenjamini uthi, 4 ‘Nanku okutshiwo nguJehova: Lingaphumi ukuthi liyekulwa labafowenu. Buyelani emizini yenu, lina lonke, ngoba lokhu kuyikwenza kwami.’ ” Ngakho balalela ilizwi likaJehova, babuyela emizini yabo, kabasayanga kulwa loJerobhowami.

URehobhowami Wakha Izinqaba KoJuda

5 URehobhowami wahlala eJerusalema njalo wakha imizi eyizinqaba koJuda:

6 iBhethilehema, le-Ethami, leThekhowa,

7 leBhethi Zuri, leSokho, le-Adulamu, 8 leGathi, leMeresha, leZifi, 9 le-Adorayimi, leLakhishi, le-Azekha, 10 leZora, le-Ayijaloni, kanye leHebhroni. Le kwakuyimizi ebiyelweyo koJuda lakoBhenjamini. 11 Waqinisa izinqaba zayo wabeka abalawuli bempi kuyo, wabuthela ezinqabeni ukudla lamafutha om-oliva lewayini.

12 Wafaka izihlangu lemikhonto kuyo yonke imizi, wayiqinisa kakhulu. Ngakho-ke wabusa koJuda lakoBhenjamini.

13 Abaphristi labaLevi kulezozabelo kulo lonke elako-Israyeli bamsekela. 14 AbaLevi bahle batshiya amadlelo abo lempahla, baya koJuda lakoBhenjamini ngoba uJerobhowami lamadodana akhe wala ukuthi bangabaphristi bakaJehova. 15 Wasekhetha abakhe abaphristi wababeka ezindaweni zokukhonzela, labezithombe zezimbuzi lezamathole ayenzenzile. 16 Abezizwana zonke zako-Israyeli ababezimisele ukukhonza uJehova uNkulunkulu ka-Israyeli, balandela abaLevi eJerusalema ukuyanikela imihlatshelo yabo kuJehova, uNkulunkulu wabokhokho babo.

17 Baqinisa umbuso kaJuda basekela uRehobhowami indodana kaSolomoni iminyaka emithathu, belandela indlela kaDavida lekaSolomoni ngalesosikhathi.

Abemuli KaRehobhowami

18 URehobhowami wathatha uMahalathi, indodakazi kaJerimothi indodana kaDavida, leka-Abhihayili indodakazi ka-Eliyabi indodana kaJese, waba ngumkakhe, 19 wamzalela amadodana la: uJewushi loShemariya loZahamu. 20 Wasethatha njalo uMahakha indodakazi ka-Abhsalomi owamzalela o-Abhija lo-Athayi loZiza loShelomithi. 21 URehobhowami wathanda kakhulu uMahakha indodakazi ka-Abhsalomi ukwedlula bonke omkakhe labafazi beceleni; wathatha abafazi abalitshumi lesificamibili, labafazi beceleni abangamatshumi ayisithupha.

22 URehobhowami wabeka u-Abhija indodana kaMahakha ukuba abe yinkosana enkulu kubafowabo ngoba wayeqonde ukumenza inkosi. 23 Wenza ngokuhlakanipha, amadodana akhe wawabeka ezindaweni zonke zakoJuda lakoBhenjamini, kuyo yonke imizi ebiyelweyo. Wasebanika ukudla okunengi, wabadingela labafazi abanengi.